२४ चैतमे धनगढीमे आयोजना हुइल कार्यक्रममे उहाँ छलफल कैना क्रममे हम्रे अपन थारु भाषा, संस्कृति, भेषभुषा बचाइक लाग इतिहास हम्रे अपनेहे लिखे परल कोइ औरेजे आके हमार इतिहास नै लिखडी कलै । 

उहाँ आगे कहलै, हमार थारु भैयाहुक्रे कृषिमे आत्मनिर्भर किल नै होके पेशा विविधिकरण कर सेक्ले बाटै । कोइ बैदेशिक रोजगारमे जाइटा कलेसे कोइ लोकसेवा पास करके जागिर खाइटा कलेसे कोइ थारु परिकारके रेस्टुरेन्ट खोल्के व्यापार व्यवसाय सञ्चालन करटै । थारुन्मे सामाजिक चेतना, राजनीतिक चेतना आ सेकल बा । आब थारु अपन मुद्धा अपनेहे उठाई सेक्ना होगिल बटै ।

साथे उहाँ थारु विकासके चावी हुइट, थारुन्के चौतर्फी बिकास नै हुइटसम नेपालके समग्र विकास नै हुई सेकी कना बात बटैलै । उहाँ थारुनके जग्गा बिक्टि गैल सवालमे हम्रे थारु माल पाके चाल नै पैली, यी हमार बरवार चुनौतीके बाट हो कना विचार रख्लै ।  

ओस्टके, थारु आयोगके सदस्य तथा अधिवक्ता शान्ती मोदी थारु आयोग धनगढी, धनकुटा, बुटवललगायत प्रदेशस्तरीय क्षेत्रमे विपन्न थारुहुकनके लाग लोकसेवा आयोगके फ्रि कक्षा सञ्चालन करल जनैलै । साथे महिला सशक्तिकरणके सवालमे थारु आयोग महिला सशक्तिकरणके लाग महिलाहुकनके लाग टमान खालके कार्यक्रम करटी आइल जानकारी डेली । 

डा दहित ओ अधिवक्ता मोदीसे थारु भाषा, संस्कृति, प्रयास, प्रगति ओ चुनौती कना बिषयमे सहजकर्ता इन्दु थारु बातचित करल रहि । 
बार्षिकोत्सवमे बातचित घरके बरघर ठाकुरप्रसाद करियाप्रधान, किसन्वा माधव थारुलगायतके व्यक्तिहुकनसे बातचित घरके थारु क्यालेन्डर विमोचन कैगिल रहे ।

कैलाली जिल्लाके धनगढीके थारु छात्रवासमे आई बातचित घर के एक वर्ष उत्सव मनाई कना मूल नाराके साथ समाज रुपान्तरणके लाग बातचित घरके सांस्कृतिक कार्यक्रमसहित भव्य रुपसे पहिल बार्षिक उत्सव मनागिल ।