१
जोगि भुइ घस्क खेल्वार ड्यास गलाइट 
नक्ली ठर्वन जस्टक जन्निन मुन्ड्री घलाइट
अट्वल्या जिउगरक उराइटा डुरिक चिरै 
टरसे जस्गरक मुस्वन अट्वा ढलाइट
ब्यार खाक चौकस नि मान्ठुइट गिउरन 
सङ्ग रहारङ्गिट कर अखोरे बलाइट
गाउँम बन्वक राहा बुटैना ख्याल बा 
लर्का घरम हाँठ हाँठ सलाइ चलाइट ।
२
यी बजार म ओसिन का पा जैठा
डेख्क डुनिया फे लस्गरक आ जैठा
ठरुवा परड्यास जैना, घर बिस्रैना 
आसम यहोर जन्निक, साँस जा जैठा
रैटीक कुठ्लिम एक डाना डर्या नै हुइस 
जिम्दर्वक घरम सड्ड भ्वाज खा जैठा 
जौन ठाउँम ढ्याउर डुखी मनै बाट 
उह ठाउम भगन्वक भजन गा जैठा ।
३
कहुइया कैडेल करम जाट्से खोटी बा 
खुसि लिख्ना लिल्हार फे ट छोटी बा
गाउँ चिर्वाइन गन्ढाटा, टिह्वारक डिन 
घरक भन्सम जरल, फुस्र्या रोटि बा
लर्का रङबिरङ्क रिबनम ख्यालट 
छाइक भर कुल्मुलाइल, पुरान झोटी बा
डिउटा जिन रिसैहो रै, छाँकी डेहटु 
किन नि सेक्नु करुवा, फुटल टोटि बा ।
४
पैल्ह ट बुझ परल जिन्गिक सार ह
का डोस लगैठो बिचारा लिल्हार ह
डोकानम आढुनिक गफ लरैना मनै
साइट बिगारल कैख रगेट्ठ बिलार ह
गँवल्यन लग्मानी हुइल ठेसे ठर्वक
घर आक सड्ड(सड्ड  पिट्ठा पर्यार ह
ड्वासर जन्हक कमैया लागल ट उ
बहुट पाछ पज्गुराडारल आपन बिचार ह ।
५
भुवर बिहानसम छोट्की, ढान कुट्टी बा 
खवर नि पाइट कब काम, कब छुट्टी बा
बखारी भरक्टे मुस लक्लक्याइल बाट 
गाउँम ढान डुढी होक बल्ल फुट्टी बा
जन्ना मटाँवा बेराम बा, सब्ज ठोप्री बजाइट
के सम्झी गाउँक बल्गर हर्झौखी टुट्टी बा
बिचारी डिडिबाबुन, डाइह ढुइना कर्रा पर्ठिन
अरोट करोट लौरा आम्हि, पठ्रीम मुट्टी बा ।
६
पल्पल पल्पल निम्झटा अजर्या राट
आम्ही बट्वैना पलि बा जिन्गिक बाट
आब पो मै अक्कल्हे बाटु, डुखक ब्याला
सुखक ब्याला बहुट रलह पक्रुइया हाँट
सुख्ला रुख्वा हुरि, पानीसे बचैटी रहल
चिरै अइबो नि कर्ल घुम्टा समझ्क ठाँट
जिम्दर्वा घनि घनि अइठा रकट चुस
बेन्हुक एकचो चुस्क चुपाजैठ, उरुसक जाट ।